இன்னும் ஒரு தடவை

முன்னே ஒரு தடவை – உங்கள்
முயற்சிகள் தோற்றிருந்தால்
இன்னும் ஒரு தடவை – உங்கள்
இயக்கம் தொடர்ந்திடட்டும்
என்றோ விழுந்தவிதை – அதை
எண்ணிக் கிடந்திருந்தால்…
இன்னொரு தாவரமாய் – அது
எப்படி எழுந்திருக்கும்?
முன்னே ஒரு தடவை – உங்கள்
மனம் கொஞ்சம் சேர்ந்திருந்தால்
இன்னும் ஒரு தடவை – உங்கள்
இதயம் மலர்ந்திடட்டும்
என்றோ மறைந்த கதிர் – அதை
எண்ணிக் கிடந்திருந்தால்
இன்றைய கிழக்கினிலே – அது
எப்படி உதித்திருக்கும்?

முன்னே ஒரு தடவை – சிலர்
மூர்க்கம் புரிந்திருந்தால்
இன்னும் ஒரு தடவை – உங்கள்
இதயம் மறந்திடட்டும்!
என்றோ உழுத வலி – நிலம்
எண்ணிக் கிடந்திருந்தால்
இன்று விளைந்தவற்றை- அது
எப்படி வளர்ந்திருக்கும்?

முன்னே ஒரு தடவை – உங்கள்
முனைப்பு குறைந்திருந்தால்
இன்னும் ஒரு தடவை – உங்கள்
எண்ணம் குவிந்திடட்டும்!
என்றோ கலைந்ததெல்லாம் – முகில்
எண்ணிக் கிடந்திருந்தால்
இன்று மழைத்துளிகள் – மண்ணை
எப்படி முத்தமிடும்?