19
வாணியின் கையாழும் வாசவன் வாசிக்கும்
வேணுவும் சேர்ந்தாலும் வெல்லுமோ- பேணும்
குழந்தை குகனும் குரலெடுத்து மெல்ல அழுங்குரலில் பொங்கும் அழகு
20
“சங்கரனுக் காபரணம் “சேய் என்பாள் “பைரவி”;
ஐங்கரனும் தம்பிக்”காம் போதி”ப்பான்-மங்கலமாய்
வள்ளிதெய் வானை விரும்புகிற “மோகனமாய்”
வள்ளலின் “தர்பார்” வரவு
(*சங்கராபரணம் பைரவி காம்போதி மோகனம் தர்பார் ஆகிய ராகங்கள் குறிப்பிடப்பட்டுள்ளன)
21
பாலாபி ஷேகப் பிரியன் விரும்புகிற
ஆலா பனைவள்ளி ஆலோலம்- காலால்
வினைப்புனம் நீறாக்கும் வேலன் நடப்பான்
தினைப்புனம் தேடித் திரிந்து
22
பண்ணெடுக்கும் நேரமோ பாட்டின் பொருளாவான்
கண்ணெடுத்துப் பார்த்தால் கதிராவான் -வண்ணமயில்
ஆடும் அசைவெல்லாம்ஆளும் அறுமுகனைப்
பாடும் பணியே பணி.
23
கருவிகளும் சேர்ந்திசைக்கும்
கந்தன் கதையை;
அருவிவிழும் ஓசை அதற்கு-சுருதியாம்;
வானத்தின் மௌனம்
விளைந்து கருவாகும்
கானத்தை நெஞ்சேநீ கேள்;
24
கொட்டும் முழவோசை கோயில் மணியோசை
எட்டுத் திசையும் எதிரொலிக்கும் -திட்டமாய்
ஓங்கார ரூபம் உலகென்று காட்டவே
ரீங்காரம் செய்யும் ரசம்.
